Православная Гагаузия

православное интернет-издание в Гагаузии

Проповедь в неделю 4-ая великого поста. Прот. Феодор Каракальчев

115 просмотров

Sevgili kardaşlar hem kızkardaılar, böön bizdä dördüncü pazar bu Paskellä orucunda. Paskellä orucu afta-afta, basamak-basamak çıkaryer bizi Allaha. Herbir aftanın var adı: dördüncü aftanın adı “İoann Merdvenci” (Лествичник).

Bu ayoz yaşardı altıncı asirdä. O kurȇr ölä bir üüretmäk, ölä bir nasaat, angısına denilyer “İiliklerin merdveni” (Лествица добродетелей). Kendisi taa onaltı yaşında gider monastırä, bobası-anası vardılar zengin, brakȇr bu iilikleri. Dört yıl orada durduynan onu yapȇrlar monah, sora 40 yıl o bulunyer monastırda. Onu koyerlar orada igumen 19 yıldan sora, da götüryarkana kendi izmetini monastırda o kurȇr te bu “İiliklerin merdvenini”, angısınnan insan basamak-basamak çıkȇr Gökteki Padişahlaa. O “Merdvendä” var 30 basamak, nekadar Hristozun var yaşaması erdä, ani 30 yaşında Hristos çıktı nasaat etmää, 30 yaşında Hristos vartiz oldu da okadar basamak var te o merdvendä da.

O “Merdven”, nicä söleer bizä ayoz bobalar, vardı Eski Baalantıda: Avraamın oolu vardı İsaak, İsaakın vardı iki oolu İsav hem İyakov. Da bu İyakov bir erdä yatyer da göryer ölä bir düş: göryer merdven, angısının bir ucu varmış erdä, öbür ucu da – bulutlarda. O merdvendän inärmişlär hem pinärmişlär Angellär. Bizim Ayoz Klisä hem ayoz bobalar söleerlär, ani bu merdven var Panayiya, Angısı baaladı, ekleştirdi eri hem Gökü. Neçin deyni Panayiyadan duȇȇr Hristos, Angısı iner erä da bizä veryer yol çıkmaa Gökteki Padişahlaa deyni, veryer kolaylık bizä kurtulmaa. İkinci da o merdven var, angısı baalȇȇr eri hem Gökü. Nicä söleer ayoz bobalar, onda var iki taraf: ruhun hem iilik tarafı (нравственный сторона). Ruhun tarafı — basamak-basamak böön savaşyerız brakılmaa günahlarımızdan, üsteleeriz kendi günahlarımızı, neçin deyni günahlarlan herbir vakıt herkerä var cenk. Açan bir günahı üsteleeriz, brakılyeerız ondan, ozaman biz pineriz bir basamak yıkarı. Ama bir da basamakta brakmȇr bizi Allah. Herbir basamakta var Allah bizimnen bilä. Allah uzaldyer Kendi elini bizä herbir basamakta.

Yıkardakı başı o merdvenin var Allah, biz çıkȇrız Allaha. Ama yok nicä demää, ani sade yıkarda bizi bekleer Allah – diil ölä. Allah var bizimnän herbir basamakta. Brakılarak kendi günahlarımızdan çıkȇrız basamak-basamak yıkarı, da nicä ayoz bobalar söleer, ani bunnan Gök yaklaşyer erä. İilik tarafı – açan savaşyerız yapmaa iilikleri, iilik yapa-yapa er yaklaşyer Gökä. Biribirinä karşı, bir taraftan, Gök yaklaşyer erä, öbür taraftan, er yaklaşyer Gökä. Açan insan yaşȇȇr yakışıklı Allaha, savaşyer yapmaa iilik, savaşyer brakılmaa günahlarından – Gök yaklaşyer ona, er da yaklaşyer Gökä da ozaman bizä taa kolay etişmää Gökteki Padişahlaa.

Prot. Feodor Karakalçev