Православная Гагаузия

православное интернет-издание в Гагаузии

Проповедь в день памяти свт. Григория Паламы. Прот. Феодор Каракальчев

263 просмотров

Bobanın Oolun hem Ayoz Duhun adına!

Bulunarak Paskellä orucunda, biz kendimizi deneeriz ya da üüredyeriz diil sade tutmaa imäk tarafından oruç, imedään yaalı, ama üüredyeriz herbir taraftan tutmaa oruç, yapmamaa günah deyni.

Böönkü gündä bizim Ayoz Klisedä anılyer Grigoriy Palama. O ikär bizi üüredyer, ani biz lääzım oruçlanalım diil sade imäk tarafından, ama dilimizlän da. Neçin deyni laflan insan var nicä yapsın pek çok günah, laflan insan var nicä öldürsün. Çok laf, boşuna laf, kötü laf, mındar laf, kimä sa maana bulmak, ne sa üfkedä sölemäk — bizdä onnar hepsicii olyerlar dilimizlän. Onnar te bu günah, angısına denilyer günah laflan. Ayoz Büük Vasiliy söleer, ani alizdän oruçlu insan, kim oruçlanyer herbir kötü laftan: çok laftan, boşuna laftan, kötü laftan, mındar laftan, üfkedän laftan.

Böönkü Ayoz, angısı anılyer Grigoriy Palama, duȇȇr zengin ayledä, onun bobası bulunyardı padişaahın yanında. Da onun çocuuna da açılyardı geniş yol, ani olmaa metinni bir adam. Ama o kendinä deyni ayıryer başka yol, ayıryer Allahın yolunu. Taa gençkana, 20 yaşında brakȇr da gider Ay Noroza (Afona) ayozların-monahların arasına.

Var ölä bir iş (подвиг) — Ayoz Susmak.

Neçin susmak?

Var nicä olsun her türlü: biz var nicä böön ne sa sölämeyelim, ama içimiz kaynasın, aklincasına beki söleeriz türlü-türlü laflar fikirimizlän içimizdä, ama Ayoz Susmak denilyer te ona, açan biz susȇrız hem dua ederiz. Bizdä olyer bir lafetmäk Kiminänsa, o Kiminnänsa var Allahlan, sade Allahlan lafederiz. Bizim içimizdä gider lafetmäk, biz lafederiz Allahlan. O var İisuzun duası, o var nicä olsun başka dua.

Dua o var hepsindän zor iilik. Bu iiliktä biz hepsimiz geeri kalyerız, neçin deyni biz bulamȇrız vakıt dua etmää Allaha. Ölä iki popaz lafeder da biri söleer: “Biz hepsimiz isteyeriz girmää Gökteki Padişahlaa, neçin deyni Gökteki Padişahlik o var bitkisiz bir er hem da o var bitkisiz lafetmäk Allahlan, bulunmak Allahlan. Da açan biz istämeeriz bulunmaa Allahlan on-on beş minut sabaylen duada, avşam on-on beş minut? Açan biz okadar bulamȇrız vakıt Allahlan lafetmää, nasıl biz bulunacız Allahlan bitkisiz vakıt, ani gireciz Gökteki Padişahlaa da hep orada bulunacız? Biz onu lääzım aarayalım, biz lääzım isteyelim herkerä bulunmaa Allahlan.

Baktıynan dünneyin çeketmesinä, ilk insannar yaptıynan günah, çeketti peydlnmaa astalıklar, mallar çekettillär biri-birinnän düüşmää, paralamaa, toprak diildi artik okadar meyvalı. Onnar oldular hepsi günahtan. Bööndä aaramaa türlü-türlü ilaçlar, saklanmaa da, ani gelmemää klisä astalanmayalım nesoy sa astalıktan – o var dangalıklık. Dangalaklık, neçin deyni herkerä herbir ilaç olyer Allahtan en ilk. Hem açan Allahı biz aylanacız da neradasa aarayacız kendimizä ilaç, ozaman biz bulmayacız onu birerdä. En ilk lääzım bakmaa, ne dooru yapmadık, nası günah yaptık? Açan onnardan ayırılacız, Allah bizi koruyacek. Var nicä olsun, ani insana yok nicä kurtulmaa, ama Allah oradan da kurtaryer. Bizdä olyer ölä, ani, en ilk, biz aaz inanlı, ikinci da, bizdä yok umut Allaha. Onnar var nicä demää, ani baalı ikisidä bir erä. Bizdä pek tez var atılmak Allahtan. Eter bizä astalık diisin, acıtsın, biz pek tez unudyerız hepsini. Kaçȇrız, var nicä dolaylarım bütün dünneyı, ama sade görmerız, ani Allah çıkȇr te bölä önümüzä, kalyer da gösteryer, ani te Bän senin önündä, Bän sana varım yardım herbir işä. Ama biz onu itiryeriz bir tarafa, aylanyerız da kaçȇrız, gideriz o küüyä, bu küüyä, öbür kasabaya, öbür topraa, başka erdä neradasa aarȇȇrız.

Ama…

…Allah hep bizim önümüzdä, bizä uzadyer hepsiciini: ilaçı da, ii yaşamayı da. Ama biz onu görmeriz, neçin deyni köörüz canımızlan, yada Onu itiryeriz bir tarafa da deyeriz: “Kaç da brak bizi, benim var zoorum, var astalıım, var başka işim, bän lääzım kaçınayım da buleyim onnarın ucunu”.

Aaramaa sa hiç diil lääzım, herbir iş var Allahtan. Allah veryer, uzadyer onnarı hepsini bizä deyni, sade yapma günah, aç gözlerini, savaş kendini götürmää, nicä düşeer, da Allahtan herbir işi kabledecän. Amin.

Prot. Feodor Karakalçev