Göryeriz, ani bu izmet (служба) diil ölä, nicä herkerä, neçin deyni bu var Liturgiya İlerdän Ayozlanmış baaşışlar. Te bu Liturgiyayı kurdu Grigoriy İkisözlü, angısı taa bulunyardı Klisedä, angısı taa olmadıydı paya.
Grigoriy İkisözlü kurȇr bu Liturgiyayı, neçin deyni ilk vakıtta hristiannar yanarmışlar komkaya, neçin deyni onnar dayanamamışlar. Neçin deyni Paskellä orucunda olyer sade cumertisi hem pazar günü izmetlär bütün Liturgiya. Da onnar dayanamȇrlar çok vakıt durmaa komkasız, bakınca bizä. Biz böön var nicä almayalım komkayı yıllarlan, var nicä alalım komka yılda bir kerä sade, var nicä birkaç yıl almayalım, var nicä hiç yaşamamızda almayalım…
Biz bırada işidyeriz da: “Вкусите и видите, яко благ Господь”. Biz herbir iştä ölä: şini, açan tuttuysak trimur, biz göryeriz nekadar bizä deyni var tatlı herbir imäk. Açan biz böölä komkayı savaşyerız almaa, göryeriz nekadar bizä ii var Saabi — “Вкусите и видите, яко благ Господь”. Açan biz aaç durmuşuk bir-kaç gün yada aftaylan nesa imemişik doyuncasına, sora herbir imäk bizä görünyer paalı. Açan sa bizdä var çok türlü imeklär, nicä böönkü gündä, biz ayıryerız. Açan sa sıra gelyer zoor çekmää birazçık, ozaman biz annȇȇrız, nekadaradak ekmek paalı bizä.
Şindi açık kliselär, biz böön bulamȇrız vakıt gelmää klisää. Deyeriz, ani benim var işim, bän etiştirämeerim. Açan koolardılar ilk yıllarda hristiannarı, ozaman yapardılar saklı izmetleri, giryardılar katakombalara, er altına, nerada sa savaşyardılar saklı yapmaa izmetleri da almaa komka. Onnara diildi koorku te o, ani onnarı tutaceklar, zeetleyeceklär, öldüreceklär. Onnara deyni paalıydı te o izmet, paalıydı onnara komka.
Ama biz sınaştık, ani bizä deyni sıra gelmedi cenk etmää bizim klisä için, ani açılsın klisä. Bizä onnarı sıra gelmedi geçirmää, biz geldik azıra. Onun için da biz onnarı saymȇrız, annamȇȇrız bütün paayını, nekadar paalı bizä deyni böön açık klisä hem biz var nicä alalım komka. Biz böön istämeeriz tutmaa oruç, biz böön üşenyeriz gelmää klisää, biz böön istämeeriz dua etmää evdä. Ama annamaa deyni herbir işin paayını, lääzım birazçık zoor çekmää, ozaman biz çekedyeriz annamaa. Böölä bizä deyni sıra geldiysa zoor çekmemää, zeet çekmemää, ozaman lääzım salt şükür etmää Allaha, ani kim sa döktü kanını, kim sa çalıştı, kaçındı kliseleri düzmää yada kliseleri açmaa deyni. Onnar bizä lääzım olsun herkerä paalı, başka bişey diil lääzım, sade sayalım. Da gelmää te o azır kliseyä da almaa komkayı, angısını Hristos büük zeetlärlän çekti da verdi bizä…
